Proza

Povečane slike

Ko bi mi i veruval gda bi povedala kak nemam sliku neg tekar z škole gda smo se si slikali? Cela škola na kipec! Nesmo se slikali ni sako leto neg gda bi došel slikar kej je išel od škole do škole. Ni ne znam kak sem zgledela kej dete. Negda je tak bilo: nemaš kej denes najprvo sliku z ultrazvuka još gda si v matere, onda z materju na postele i z narukvica z istu numeru, a onda kak familija zilazi z bolnice. Negda se i retko ko zlegel drugde neg doma jel če bi mater zafrknulo negde v polu jel na livade, a sad do prvoga koraka več imaš slik više neg negda za života.

Gda se des ideju povenčati, skupleše zideju slike i još i film neg jelo, če se i triput je. Dukše se kojekud slikaju neg jeju. Fotosešn: mladenka i mladenec sami. Fajn trošek za debeloga kuma. Kej buju z te slika kej zglediju kej one kej su je mladenke vidle v najfineše novina, v filma. Kulko bu put još i ko to gledel? Kej kakva zmišlena pripovetka. Negde traje dukše neg ljubav, brak.

Prede bi slikar jedva naredil par slik od se svatov, kej vekša svadba, to bole. Si bi se nastavili, trajalo je to slagajne, to je bila cela filozofija i z obleču, a i z visoke i niske kak bi se vidli, a negda se ni oni kej bi trebali zajeno stati nikak nesu mogli pripasati da jim boga daš. Na kipec. Si bi bili veseli i si bi se smejali. Mladiči sredi, a dojne z sake strane debeli kumi, vuz mladenku mladenkini, a vuz mladenca mladencovi, pak sveker i svekrva i punec z punicu, klenceri i klencerice, rođaki, cela familija, susedi i se tak do zajnega, z jene strane barjaktar, a z druge bariloš. A i mačkari bi se nastavili, če bi došli. Niko ne bil zviš. Nam su i farbe došle puno kesneše.

Sprevode negda nesu još slikali, a i nesu tulko naslikavali ni se druge sakramente kej se poslikati moreju. Slikal si se v škole, gda si se ženil jel udaval i če te, ak te, još nečiji svati zavjemeju. Ak nigda, sam si se slikal za legitimaciju i za par let pak za novu legitimaciju jel za pašuš če si išel kam v strajnsku zemlu delat. Samo su se najbogateši mogli dati baš naslikati na platno v rame. Ne bilo ni cajt ni penez, a ne bilo ni fotoautoknipsa ni selfija.

Jeno vreme je bila takva moda da su po selu išli oni kej su delali povečane slike. Venčane. Daš jim nejnu i negvu sliku, če nikakvu onu najmenšu za legitimaciju, platiš, i za neko vreme oni ti doneseju fajn veliku sliku mladičov samo za vramiti i deti na stenu. Pripovedaju da negda ni sami slikari nesu mogli najti čija je koja slika kulko su si bili slični. Nesu onda imeli kompjutora da bi deli sliku da mašina čovjeka postara kulko let očeš. Negda jesu a negda bome i nesu mogli vpariti za sliku mladiče z slike mladenke kej ima sedemnajst let i mladiča gda je bil vojske pak od šapke ne moči videti jel ima crne lokne, visoko čelo jel opče nema lasi. Mladenke pak odrežeju kečke i nafrčeju trajnu, a da haube sirota nigdar ne ni vidla, a oko vrata i na vuha je obesiju bisere kakve je vidla još i mejne. Da su je bar sekance jel kakov dukat narisali. Sem su mladenkam risali jenaki šlajer, kej da ga je jen išel od hiže do hiže. Mladiči su imeli si kej jenu krvatu, koso naštrajfanu. Nekojem to ne bilo prav, al kej buš.

Si su šteli imeti povečanu venčanu sliku, za uspomenu i gda se luftaju soba i postelina, da je prek z ceste znad bračne postele, vankuša z rožami i bebe z Ponte rossa lepo videti. Bile su to takve slike. Ne bilo videti kak su nekoji imeli vitice z dinara.

A slikari, gda su se pomogli, potle nesu više ni hodili po sela, neg su čekali da se dojde k nem. Otprli su radijonu, postali majstori, artisti kej su risali, graverali slike na spomenike i fajn bome poskupeli. Moreš tam na grobju, na mramoru, kej da si v galerije na otprtom, videti sakoga kej je tu živel i sakoga kej je bil za kej pak si je v to jeno vreme mogel platiti skoro večnu povečanu sliku, zestruganu v mramoru. Mogel bi z toga negativa narediti na paperu i pozitiv, i to ne jen. I ko bi štel, mogel bi imeti gravuru doma za sliku pokojnoga za na stenu. I onoga vučitela z visoke čižma, i onu kej je z Titanikom krenula v Ameriku al se ne vtopila, i onoga kej je celi život prehodil z crnemi lasi i z bele rukavica, a i one jene kej je ne na jenem neg na tri spomenika, z sakem svojem pokojnem! Negda si si mogel povečanu sliku pokojne babe, kej se nigda naslikala ne, a bila ti je jako dobra, naručiti tak da si dal svoju sliku na koje si je jako sličen.

A če si na spomeniku štel imeti nekej poprav lepo, moral si naručiti za života, da bi ti, gda te ne, mam na grob postavili. Ne znam bome jel još i denes to delaju, al jeno je vreme saki koji bi i jenu videl, nikak mu slika ne štela z glave ziti i mam bi si mislil kak bi si i sam nekej takvoga dal narisati, nekej kej je to v negvomu celomu životu baš za navek deti na spomenik.

Manje poznate riječi:
mladiči – mladenci, mladenac i mladenka
mačkari –
mačkare, maškare, maskirani osobito veseli svatovi
sekanci – vrsta tradicionalnoga narodnog nakita u niskama oko vrata
krvata – kravata
vitica z dinara – vjenčani prsten koji nije zlatan
graverati – raditi gravure
zestrugan –
ostrugan, nastrugan, ovdje: uklesan

Slika: Čižme

Ne to jen grob nek mam za dva, al saki ima svoj del i okolo zajeno poprav železni kovani plot kak su delali gda je to počelo mesto starinske drvene plotov, a prede pitonskih i zelene. Sam si je to del kak si je štel još dogda je bil živ i dogda je matrijal trajal zanavek. Denes se, još majstori ne odeju domom, i ciment i fuge i se samo trusiju.

Bi mu ludi, negvi džaki, još i sveču zapalili, da moreju. Al nemreju. Kak bi prek tak visokoga plota? Najtvrdoglaveši su probali čez prlke, gatre. Spočetka su još i probali, a leta i leta več niko i ne proba. Valda sin, a dugo je i on pokojni, del je lokot na vrate, onda je to zahrdžavelo da ne ni familija mogla raspreti i onda su, kej drugo, neg ga strgali i samo prideli, prislonili i duge leta se to tak stoji. Ne znaš jel smeš vu to dirati, jel nesmeš. Tu i tam bi koja travka zišla zmed sega toga i zišla i rasla, a kak bi zrasla, tak bi se posušila. Mislil bi si čovek kak bu to zaraščeno, al ne. Niš tu ne ni neče ni nemre rasti. Par nekakve cvetekov zatekneno stoji već par let. Vekivečno. A se je nadživelo, zgledi, i se negve džake.

Slike je još bilo videti: ona z malem škrlakom, damskim – piše: med. sestra – a on – piše: učitelj u miru – v rajthoza i v bele košule, z škrlakom i z do kolena visoke crne čižma. Čovek bi si mislil, prede neg bi prečital, kak je bil na priliku žandar i to ne za ove zajne Jugoslavije neg i v one pred nu, pred onem ratom, gda su čižme crne z visoke sara bile preštimane. Crne gavranske, naboksane da se se svetiju.

Morti je to zato kej je teško bilo imeti takve čižme vuz tulko gliboko blato, a više kej je te vučitel prek sega blata do riti z Križa v Jokešinec na kojnu jašil. Na belome, pisanomu. Na belomu kojnu v rajthoza kej kakov oficir i z crne čižma, visoke, prek do riti kej bi se reklo, a do kolena. Tak su nosili i v negvomu kraju odkud je došel. Jedino kej bi si on prek pleč nahitil tamburu, bugariju. Z dva cofa kej trobojke. I deca bi saki dan vuz negov dvotakt de-ge popevala cumba-cumba-kara-mustacumba-cumba-futes-dum. Morti bi mu bole na slike tambura pasala, al ju ne zebral.

Kulko je let imel gda je očel na one svet, niko se ne seča, nes ni prečitala, al je vučil pod zajne i mojega muža v Križu jedno deset let potle Drugoga rata kak mojega tatu v Jokešincu potle Prvoga rata. Bil si je z muževem dedom kej je triput bil v Amerike velik pajdaš i sako malo su se o velike politike spominali, jel bu rata jel ne. Donašali bi mu vina, pečenku za Božić, šunku za Uskrs, kak je ko imel i kak je ko mislil da nemre škodeti.

Ja ga nekak znam samo z te slike z grobja. I z slike z celu jokešinsku školu kej mi je po tate ostala i z pripovetke kak je jako decu štel tuči z tenku, tenku šibu, onu kej najviše boli. I kak je za nekej i moj tata trebal dobiti po gole riti i onda, mesto da spusti pantalone i nalegne se prek klupe, mali je skočil na vučitelov stol i z stola prek jobluka i bež. Sem zaboravela kej su pripovedali da je potle bilo.

Da moremo, sejeno bi mu zapalili kej več palimo, če zvana. A pak, gda si je tak štel, kej mu mi moremo? Onda se spominamo da je morti to tak sam zmislil namerno kej se je bojal da mu nebu ko ni imel zapaliti sveču, deti cvetek. Cumba-cumba-kara-musta-cumba-cumba-futes-dum.

Manje poznate riječi:
rajthoze – vrsta muških hlača, proširenih u gornjem, a suženih u donjem dijelu kako bi mogle u visoke čizme
cof –
pompon, vuneni ukrasni privjesak, čest na kapi

Slika: Ne dva z malu

Čem su se drugi put zeli, mam su si dali i spomenik narediti. I sliku. Povenčanu. Ne onu gda su se prvi put zimali, neg gda su se drugi put zeli, gda je mala mej nimi stala kej da je i nejna kak i negva. Takvu su si sliku dali i povečati: da nesu imeli ružmarin prevezan z trobojku, niko ne bi ni mislil kak je to svadba. Ne niko najne ni zajuknul. Ne jim te put bilo drugač neg zanavek. Mater je svoju Bara zakopala zmej toga kak je dvaput bila pri Pepcu i tak je mater pridela na spomenik, brez slike. A se tri su napisali. Za ne dva ostavili su da bi samo dopisali gda vmerneju. Nesu još, nema ko. Al ko ne zna, tak je tu i dale za videti samo sliku sreče.

A to, kak je ne mrla mater, sveker kej je više ni ne bil sveker, došel je najprvo prvu noč čuvat staru, a onda na sprevod i drugu noč na karmine. Da bu je pri ruke. Onda je rekel kak bi se štel pospominati žnu i mam ju je pital jel bi se ona pak vrnula k negvomu sinu. Zna on, je rekel, da ju je tukel, al nebu mu ju više dal tuči. Se bu drugač neg je bilo prvi put. Naj si ona sejenak još jemput dobro premisli. Mam je Bara znala: kej tu ima za misliti? Volela je ona Pepca kak ga je volela i se je mislila kak je ona žnem negde zapisana.

Pepec se ne štel dugo ženiti kej su negvu curu Janu dali zamuž gda je nekulko let bil v vojske i v ratu i na Križnomu putu i ne se znalo jel bu se igda i vrnul. A gda se je Pepec vrnul, Jana je svojega, kej se k ne priženil, otirala i šteli su se ona i Pepec pak složiti. Pa kej kej je imela muža, i Pepec je naredal druge cur i žen. Sveker ne dal i ne: nebu k nem pod krov za snehu takvu ženu dopelal. Nekak ne ni ona štela ze svojega doma v niovu veliku familiju, neg je štela da si napraviju novu hižu. I kak su se baš nekoga vraga posvadili, stari je dal hižu delati, ali našel je i Baru. I vrednu i zgodnu. I Pepec je rekel da onda dobro, zel bu Baru. Stari je mam očel se dogovoriti i mam se svadba stvorila. Jana se prešla prek v Nemačku, kak se je več išlo, i samo bi tu i tam došla na urlaub.

Baru ne niko niš ni pital, ni jel bi štela ni jel je se dečko dopada. A je. Pepec je je rekel kak je na stvari, da on nu nema rad, pak če je je to sejeno. Kej bi je bilo, al i tak su govorili da to dojde potle. A potle…

Da je barem mogla šuteti, gda je vidla kak on spi kojekud, samo ne doma. Nekoji su svoje žene tukli čim bi i koga drugoga pogledele, jel radi čega takvoga, a Pepec Baru reda radi, da ne bu zgledela drugačeša od druge, zato kej mu je bilo sejeno, dugočasno. Bu i to prešlo gda deca dojdeju, si je mislila, al kak nesu došla, gusto je bila sa crna, zelena i plava.

Ne to mogla više durati i očla je k matere. Ne domom ni meblin vrnula, a nemu su več nasnubili curu z trejtoga sela. Ne za dugo, i ona je svoje dobila, če mu je i curu rodila. Sam je Pepec rekel kak je rada prifrndavala. Ne mala ni prehodila, je prešla. I ona prek v Nemačku. Jedino kej su nu splatili kak je i iskala. Zela si je i advokata. Pepcu je dete ostavila. I kej bu, i tak ju sveker, Baru, dopelal nazaj. A nebu ju, obečal je je, više dal ni tuči.

I sama si je mislila kak bu morti i on bolši, če bu šutela. Šutela ne šutela, ne trajalo dukše neg od repnoga brajna do obrezivajna i pak ju je sako malo če flisnul. I pred malu, koju je imela rada i bole neg da je nejna. Bila je je više neg prava mater, kej ne ni pitala zajnu, a i da je, ne bi Pepec dal ni da ju vidi. Baru je morala zvati materju, a ona je je šivala suknice najlepše v selu, plela kečkice jel česala rep, vezala mašline, štrikala vestice. Pojne su mustre žene zimale. Bara ju je sekam sobu pelala, si su je gledeli, ne to gusto za videti.

Več je mala i v školu hodila, gda ju je jemput otpelala da ju prava mater vidi, če zdalkoga. I za to ju je Pepec stukel. Mala mu je, lajava kak je i mater, se spripovedala. Kak je joca vidla i čula, a navek bi Pepec našel zakej Baru treba če šupiti jel ju prekleti, tak je je i mala bila grdo zločesta. Poprav kej kakov dečko. Se dogda ne očla zamuž i prešla v Nemačku. Nigda nesu zeznali jel k matere jel kam drugam. I na se se to Pepec grdo srdil i još je bole jurišal na Baru. Najrajše bi je jenu prislonil kej da ju je ona kam poslala, kej da ju ne volela kej svoju. A mogli su si tak lepo živeti i doživeti se. Baš ničega jim falelo ne.

Gda je krenulo, Bara ni sama ne bi znala povedati. Samo ne mogla spati. Ni po noči ni po danu. Doktor ove, doktor one. Lek ove, lek one. Potle su ju oko bolnica pošilali. Najdukše je bila v Popovače, v ludnice. A se gore i gore. Na grob materin je išla kej na svoj. Palila sveče i za mater i za se. I gledela bi sliku. Imela je čuti, navek se najde takve dobre ludi, da i mala ima svoju decu, sineke, al Bara ni jenoga ne nigda vidla. I za Božič su prestali dohadžati. A gda se je zakuhal rat, jugoslavenski pašuš nesu premenili v hrvatski, da dečki ne bi morali sim v vojsku iti, neg v nemački. Gda bi Pepec zval čer tu i tam, ni na telefon ni na mobitel se se mejne štela javiti, a nuki morti nesu više ni znali jel nesu šteli znati spominati se žnem.

Bara bi i ovak i onak na to dobila svoju porciju. Više ni babe nesu bile posredi: negdašne su spomirale, a denešne, mlajše, nesu ga štele ni vuz plaču. Tulke si je leta Bara mislila kak bu bole, kak bu se premenil i najeput više ne imela kej čekati. Se kej je moglo, več je prešlo. Ona pe, a on si naj zeme koga si oče. Ko bu takvoga zločestoga Pepca štel če obeteža i zalegne v postel? Više je ne ni bilo do toga da ga ima samo za se, če i takvoga. Nekak si Bara više ne, kak prede, mislila da bu mu se kej je je delal samo vrnula. Mislila je kak je je dost, kak bi si samo štela leči i počinuti. Da je bu mir.

Najprvo si je mislila da bi bilo najbole da se leke kej ima piti, pun natkaslin, v sakojem lajdleku, popije najemput i lepo zaspi i nigda se ne zbudi. Pa naj on kune i zaklijna kulko oče, naj tuče i naj dela kej god oče. Morti bi se i plakal.  Ne bi vraga! Potle je mislila kak bi mogla prejti pod vlak. Al ne mogla videti krv. Onda si je zebrala štrik. One za veš sušiti. Dok se je premišlala jel bi ga zahititi bole bilo za roge na tavanu jel na štaglu, od se sliv v sliviku za štalu, našla je jenu mlajšu, žilavu bistricu. Gda su potle mikavali lotru kej ju je prislonila vuž nu da bi ju sneli, muži, susedi, čudili su se kak grana ne pukla pod nu.

A gda je ne bilo, Pepec je mislil kak je Bara nekam prešla k susedom jel kam. Potužiti se pak kak ju vreme jebe, kak se stalno tužila. Ne više imela ni kam, ko bu stalno poslušal jeno te jeno. Gda je dugo ne bilo, poiskal ju je sekud, i po soba i v špajze, i v podrumu i na tavanu i po svincu i po štale i po šaglu i na seniku. Sekud. Potle su mu susedi došli povedati da naj ide, da mu je Bara v vočaru.

Pepek je sedel pod slivu, niko mu ni štel reči naj se pomekne da pači. Samo je govoril, kej da se žnu svadi, kak je bila prek luda, bedasta kej noč, da se ne imel ničemu drugomu ni nadati, da ne mislil da bu se baš fundala i kej mu je to od života naredila. A stalno se samo tužila kak ju vreme jebe dok ju ne dojeblo. Tak mi napraviti! Ne znaš jel vekša nesreča jel vekša sramota.

Ne mislil da mu je v frižideru, kej da se na dukše ide lečit, ostavila skuvano za te i još za dva dane, se do sprevoda, i da i tem svojem crnem težakom toči rakiju od sliv kej je ona i sadila i pobrala i spekla. Kak su ju odvezli, ne ju više ni videl. Na sprevod je očel, kej bu, ionak ne bilo puno ludi. Čer mu je na telegram kej je poslal da bi mam došla, otpisala telegram z crnem cvetjem kak bome nemre dojti nikak.

Za sprevod je bil baš lepi dan.

Manje poznate riječi:
zajukal, zajukati, jukati, jukanje – veseli svatovski tradicionalni poklič
vmerneju, vmreti –
umrijeti
pospominati se – porazgovarati s kim
prifrndavati – sitničavo, zlonamjerno prigovarati
pašuš –
putovnica; dokument za prodaju stoke na sajmu
žnem –
s njim
pači, pačiti –
smetati

Slika: Taška

Baš kak sem si i mislil. Kak sem si i štel. Prolaziju ludi tak, pak se nekoji zaglediju. A nekoji se i zestaviju i glediju kej da nesu na grobju. I imaju bome kej i videti. Nekoji, če imaju komu jel sami sebe, a još tulko morem čuti, veliju: jesi ti to videl, kej da si ne mogel novu tašku kupiti? Tobož, ja.

Mogel sem, mogel, al nesem štel. Ne se to zeznalo ni za mojega života, a posle ko bi to i spripovedal gda nes nikomu povedal. Ni žene. Bi me vtorožila! Kak bi me i da ne vmrla prede mene pak da sem del slike sakoga samoga, da nes del na spomenik našu povečanu sliku, nu mladu, kak je štela, a sebe starešega, se lepo priredženoga, v odelu od sameta na rede, košula lepa bela z srebrne gumbi, lepo podšišan, i lasi i brke, se kak se šika. Jedino kej držim tu svoju prek staru tašku.

I vidi se mam da je stara. Da me ko pita, ne bi se ni setiti mogel de sem ju i gda kupil. Taman su prešle platnene domače torbe i došle taške od svinske kože, brez poctave, kej za v školu iti; za malu pletenčicu z vodu če ožedžam, za malo špeka i kruva če zgladnem, kebu če treba kej prerezati.

Odnavek sem ju imel. I sekam sem ju sobu nosil. Kak sem bil pretržec, valda ne bilo mesta de nesmo bili, ja z tum taškum. Najprvo smo kojne kupuvali, a onda smo je prodavali, najviše Talijanom za salamu. Ne to bil posel ni težek i ni grdi. De bi se ja drugde mogel najti z tulko sekakve ludi, i više neg kojnov.

I tak sem ja vu te taške, stare i grde najprvo nosil peneze da mam platim kej kupim, a gda sem potržil, mene bi spoplačali. Morti bi si i kupil novu, ne bilo da ne bi imel tulko penez, penezov mi ne nigda sfalelo, al jemput smo išli na Popovaču za Bartolovo bilo je tulko kojnov se jen drugom zavezan za rep da je i žena išla z menu da nem sam.

I se smo mi to lepo prelifrali i samo sem još čekal peneze, pak sem rekel svoje naj ona ide na raneši vlak da priredi doma blago i jelo, a ja sem ostal čekati. I tak reč po reč, pak likovo, pak čaša po časa, partija po partija, sem se i zadržal. Ne znam bome ni kak sem domom došel. Valda me je neko dovezel. Nes tulko mogel peške. Da sem krenul, ne bi bome još ni došel.

I drugi ti dan dojde na dvorišče čovek kej ga nigda nes videl. Jeste vi taj i taj, jes, jeste vi bili čera tu i tu, jes, jeste imeli sobu kakvu tašku… Tašku? Tašku? A de mi je taška, bog te tvoj? – se me je preseklo. Jes, velim a da niš nes rekel.

A kej ste imeli vu te svoje taške? Kej sem imel? Sa je moga trgovina bila vu te moje taške. Lepo sem rekel i čovek mi z vekše taške zvadi moju tašku. Poglečte, veli mi, jel vam se nutre. Se je bilo. Sa moja trgovina. Nes mogel a ni reč spregovoriti. Samo sem stal. Nes mogel ni reč prereči. Ma ni spregovoriti, zube raspreti. Čovek je pozdravil i očel. Nes ni videl gda. Nes mu ni tringelta dal. Ni Bog ni dovidžejna mu nes rekel, a kamoli da bi mu čašicu potočil. Ni vode, a morti je strani čovek žedžen bil. A med sekakve ludi tašku je baš takov čovek imel najti! Se sem si mislil da bum ga negde negda zagledal. Da bum mu piti platil, če niš. A nigda.

I ne jemput sem si mogel kupiti tašku, al potle toga takaj nes štel novešu zimati, da mi je ko ne vkrane. Ko bu staru tašku štel? Nigda nikomu nes to povedal. A ne bi mogel reči ni kej je potle mene bilo z tu moju tašku. 

Manje poznate riječi:
zestaviju zestaviti – zaustaviti
vtorožila, vtorožiti –
zatući
vkrane, vkrasti –
ukrasti

Slika: Titanic v Jokešincu

Ne si baba dala sliku deti, ne imela z čem a i vrag ti jebi sliku. Opčina je sliku dala, a i to gda se več niko ne sečal kak je baba zgledela. Tak su deli da se bole vidi lajbek, negdašni, kej te drži da ne potoneš vu vodu. Slikar je gledel sliku v novina, kej ju je neko naredil mam kak su spašenike zlekli z mrzle vode. I ne se bogzna kej vidlo, a nesu znali jel gore baš niova ženska.

Ne znam zakej, al si su ju zvali Zvekovčica. Na internetu sem neki dan našla popisane se z onoga broda Titanica i kej su splivali i se kej su se potopili, al takvoga imena nigde ne. Nesu babe baš ni veruvale da je bila najnem, dogda nesu prine vidli one lajbek da se nemreš vtopiti na kojemu se još lepo vidlo napisano Titanic.

Ne imela nikoga svojega na svetu, a ti pri kojem je mrla dali su te lajbek za muzej negde na moru i nigda ga više nesu vidli neg na nejne slike na spomeniku na grobju. Tu i tam, gda bi bilo okruglo kak je Titanic očel na morsko deno i kak su se gusteše spravlali izložbe, za turiste kej li, drago je ludem gledeti tudžu nesreču, doklatil bi se kakov novinar odnekud iskat Zvekovčičine naslednike, grob i jel još živ spomen na tu babu kej se sama v ono vreme vsudila vputiti prek v Ameriku. Kak su se zdošli si i ti kej su ju zeli k sebe z čiste žalosti, kak bi i sakoga čoveka zeli, a i saki se je mogel najti na nejnomu mestu, opčina je prevzela brigu na se i obdržavala pripovetku kej da je to ne znam kej. Bolšu nesu imeli.

A Zvekovčica, kak je otišla, tak je i došla. I letovajne, da je kam išla a ne se onda išlo, dukše bi je trajalo. Jedino kej nigda ne mislila da bu je opče dojti nazaj. Da je, bi si če hižicu i postel ostavila da ima de prespati. Kak više nikoga svojega ne imela prek do četrtoga kolena, se kej je i imela je rasprodala da bu je ležeše početi sponova tam v te Amerike, de je več duge leta bila nejna jarganica Mara Brkanova, isto z Jokešinca, kej je tam z doma pobegla i nigdar se ne vrnula. Nosila je je i list od sina.

Sudbina, sudbina, si su govorili potle za te Titanic. Kak je krenula baš z Titanicom? Da je zebirala, ne bi Titanic zebrala! Ne zaprav ona mislila baš z tem šipom, al je bil nekakov štajk i niko ne vozil, ne se znalo ni kak bu to dugo trajalo, a ne se žurilo, pak je iskala z čem bi, z čem bi. Titanic se z toga engleskoga Southamptona, a prede z Queenstowna v Irske, navrnul vuzput i v te Cherbourgh v Francuske, de je ona kupila kartu jeftineše kej je još bilo praznoga mesta.

Imela je penez, al je šparala i ne štela hitati ni na drugu klasu, i trejta je je bila čistom dobra. Ne to za navek, si je računala. Ko zna kej ju čeka tam kam ide. A potle se ionak pokazalo da su se jenako z toga šipa, kej ne niko veruval da bi opče mogel potonuti, vtaplali si. I ovi gore i oni dole. Več ne bila živa gda su v nekakve  novina napisali kak je na brod moglo ziti 3547 ludi, a v čune ne više neg 962, da bi po zakonu morali deti 64, a deli su 20 čunov za spas. S.O.S., Save Our Souls. Sreča da su najprvo v čune za spas puščali žene i decu, a Zvekovčica je bila i fest jaka ženska i nigda ne bila v strahu malo se i porinuti i tak se je lepo uspela vrnuti z Carpathium. Za te su je šip najprvo nudili kartu, a nekak je se ne štelo, a da ne znala zakej. Jedino kej su je si novci kej je imela ostali v moru, na šipu, v kuferu. Jeno si je vreme mislila da bi bole bilo da je i ona potonula. Imela je suknu i podsukne z žepi za peneze i nosila je je skorom celi put, a onda, nekak si je mislila, gda je dotud prešla sigurna, kej bu tulki teret na sebe vlekla i preslekla se je. Si su je potle govorili gda bi čuli brez kulke je penez ostala, kak je bar živu glavu znesla z takve pogibli. A kej ti je to gda za to nemreš platiti ni najjeftinešu zafalu Majke Bože Bistričke jel Kloštranske. Ne se Zvekovčica više štela ni moliti. A ludem je samo govorila: Ne ti to more toplo kej te naš Čret.

Pripovedala je rajše, a to je sem bilo i lepše za poslušati, kulko se je straha vžila dogda ju nesu sneli v čun. Nes mogla niš misliti. Štela sem samo mam nazaj otkud sem i krenula, de sem i došla na svet.

Gda su je nudili da ju potle buju prevezli v Ameriku, rekla je: Vrag ti jebi i Ameriku! I tak, de si bila, kej si vidla, moja Zvekovčica? Nigde i niš! Se ti je jeno te jeno. Jedino, kak je se prodala za kartu tam kam ne došla, niš više ne imela na ovomu svetu. Vrag bi znal kej se je onda i vračala. Mogla je ostati i negde v Engleske, Francuske, de god. Morti bi je tam bilo bole. Mogla se je lako i potle dati prevesti i v Ameriku, kej ne bi. Od tam bi ležeše stirala i oštetu od White Star Linea, Lloyda… Ovak niš. Trebala je je samo atresa kam su je saki mesec pošilali peneze. Ne se ni znalo kulko, ne bome nikomu povedala.

Jedino su te nejni kej su ju držali na kvarteru znali da su potle ne dovezli i nekakvu škrinu, veliku kej les, okovanu. Z tem se negda išlo v Ameriku. Nesu ni oni znali kej je nutre, kluč je navek držala pod fertunom. A nutre je bilo kojekej za obleči, kej z onoga filma Titanic de cura i dečko stoji napred i popevaju, i te lajbek. Žnem je splivala, a da se plivati nigda ne navčila. V Čretu i v Česme, više v mulu neg v vode, samo su se macali kej deca.

Neko mi je lajbek dohitil, ni ne znam ko, je pripovedala. Nes ni znala kej bi žnem. Jesmo prede sprobavali, al više v zajebancije. E da mi je te lajbek, Zvekovčica moja!? Jel znaš, žena, kulko bi zajnega dobila!? Su je govorili kak kojekakvi po celomu svetu iščeju i skupo plačaju nekej z toga potonuloga broda. I muzeji su, kak je vreme išlo, šteli žnega nekej imeti. Pripovedala je da je lajbek štela dati onomu dečku kej ju je zlekel z vode, a on je ga je pak narival nazaj. Neko je rekel, ak se ne prerekel, i da bi ona štela da ju v tomu lajbeku pokopaju. Ali nesu. Dobro da su ju i narisali, lepše lajbek neg samu Zvekovčicu.

Opčinari su se potle svadili gda je trebalo spomenik dati popraviti i nesu se mogli dogovoriti. Najglasneši su bili oni kej su govorili kak su na spomenik trebali deti Titanic da saki mam vidi kej to je,  ak je več Titanic. Saki bi ga mogel mam zagledati, niko prevideti. Brod na spomeniku na velike vode kak nekam ide i se se vala, velika su mu platna napuhnuta kej da veliki veter puše, baš su si tak opčinari šteli i niko se ne vsudil jim reči niš protiv, a da niš ne čuti. A kej ta nekakva Zvekovčica kej je najnem plovila i ne potonula? I tak su se slova   se pomalo prek zbrisala, niko to niš ne popravla. Kej da je na morskom denu.

Manje poznate riječi:
lajbek – prsluk
šip –
brod
lajbek – prsluk
šip –
brod

Piše:


Književnica, novinarka, urednica, blogerica (1955.). Proza i poezija nagrađivane su joj i objavljivane u časopisima, zbornicima i antologijama te prevođene na više jezika. Uz druge, objavila je samostalne knjige: Vetrenica ili obiteljska arheologija (kajkavsk pjesme, 1990.), Enciklopedija špeceraja (feljtoni, 1990.), Lift ili politička melodrama (roman, 1993.), Oblizeki – Moslavina za stolom (zavičajna čitanka, 2006.), Bilanca 2.0, odabrane ljubavne i ostale štokavske pjesme (2011.), To Toni – Molitva za tihu sućut (pjesme, 2011.), Pevcov korak / Kajkavski osebušek za EU (pjesme, 2012.) (nagrađena kao najbolja knjiga objavljena na kajkavskome 2012.), Rez / Leica-roman u 36 slika (2012.), Kajkavska čitanka Božice Brkan (2012.) (pomoćno sredstvo u nastavi hrvatskoga jezika u srednjim školama), Obrubljivanje Veronika rupca ili Muka 2013. (pjesme, 2014.), Ledína (roman, 2014.), Umrežena (priče, 2017.) i Život večni (kajkavske priče, 2017.).

Rubrika:

Proza

Objavljeno:

26.12.2018.

© 2019 Artikulacije